39週5~~BB你幾時先捨得出黎呀?

 

 

39週5......BB仲唔出黎....不過尋晚食食下飯有一野長痛,同平時FEEL到的M痛有少少分別,大約痛左10秒到啦~之後到訓覺又有一野係長痛,又係一野10秒~唔通BB準備出黎

早幾日準爸B同佢的好兄弟BBQ,因為好兄弟結婚爸B要做兄弟,其中有個朋友仔以前係做玩具公司,俾左D公仔My Princess,最鍾意係呢個~

My Princess的第一個公仔!!

好攪笑~個樣超呆滯~準爸b就成日同My Princess講"bb你快d出黎啦!如果唔係你媽咪玩爛晒你d公仔"

My Maid's Kitchen -2

 

 

My Maid's Kitchen -2

姐姐好多時都俾D驚喜我地,因為自從第一餐之後,我唔會叫姐姐一定要煮D咩,由佢話事!我只會每日返工前同佢講我地今晚有幾多個人食飯就得~姐姐就會預份量,而我家(我媽,我爸+準爸B)個個夜晚都唔食得多,宜家準爸B係食最多果個~

呢日係爸B食的第一餐姐姐手勢,去圖先!

第一  --節瓜"讓"肉餅

第二 --蒸水旦

第三 --蒸肉餅~

爸B仲話好過出面餐廳食,仲話佢D豬肉餅好好食!~~見到節瓜,我地全家都好讚嘆~水旦勁滑,爸B話如果水旦加埋D蛤蜊入去仲好食.....我話"咁呢餐好貴喎!"

以前我地唔都會成日招呼D朋友返黎,係過時過節媽媽的契仔,阿哥阿嫂會返黎食~通常都媽媽煮,但自從姐姐黎左之後,連續3個星期六都有人黎我地屋企食飯~

My Maid's Kitchen - 姐姐煮的第一餐~

 

 

My Maid's Kitchen -1

之前我應該有講過,我家姐姐做野都好有交帶同好乾淨~所以我地都好放心俾姐姐湊小公主,但我開宗明義係講煮野食,證明姐姐廚藝係非常好~因為準爸B唔知點解條脷好尖~多左糖落多塊果皮都知我成日都同佢講不如你去做食神,我幫佢開個BLOG,分分鐘搵到錢添呀!~下次開個TOPIC講下先~

至於我家姐姐連呢個煩到震,尖到震的準爸B個胃都攪得掂,證明姐姐廚藝非常掂!!今日第一集,先講下姐姐係我家煮的第一餐,一個工人到埗,第一樣野就要試佢手勢~去到街市,我求其叫佢買左幾樣野~我本身對食的要求真的唔太大~但如果我都覺得唔好食,咁就好大镬

先去圖,睇下姐姐煮左咩~

準爸B當晚就約左人無得食~但佢都話姐姐煮雞翼個陣好想食~(但爸B其實唔多鍾意食雞架~)

連婆婆都話好好食~佢都話無姐姐煮得咁入味

準爸B都話如果日日食姐姐D野肯定好快肥~~呵呵

BB用品之網上購物格價

 

 

BB用品之購物格價

之前都講過,我係好鍾意做RESEARCH同埋由0開始做起個種的滿足感,所以我自己都覺得我係好適合做Makeup Artist!~

至於關於bb用品格價呢,其實都好多謝一班1210龍b會的媽媽!!因為佢地有好多都好利害,直頭有埋列表~不過人家咁有心~我都唔會將呢d心血當自己的經驗既!!

我自己因為有正職,所以無咁多時間周圍行去做至抵精明眼~我有同事同我講宜家網購都好方便,分分鐘仲便過吉仔有特價

彩虹嬰兒用品中心

彩虹就有門市的,係近太子花墟個邊
佢要先登記,你想買咩就加入購物藍,佢係購物滿指定數目,就免費送貨!!基本上大部份市面上的貨品都有~

康嬰之城

都有門市,近油麻地!
佢就唔使登記,但送貨要睇咩地區加錢!佢的貨品型號會較新,無寫特價價錢的貨品,就以原價的85折出售

呢2間我都有訂貨,如果有貨幾日都送到!可以先查詢有無貨才買~~我都有睇過吉仔個D,但發現呢2間平D!~建議買大型野就用佢地~好似車仔呀~床仔呀~至於小物品好似棉花個D除非你訂野個額over左可以送啦~如果唔係你去吉仔申請埋張會員卡,價錢其差唔多~